पश्चिम बंगालमध्ये मतदार यादीच्या विशेष सखोल पुनरावलोकन (SIR) मोहिमेदरम्यान नदिया जिल्ह्यातील नवद्वीप येथे नाल्यातून सुमारे ५० मतदार ओळखपत्रे सापडल्याची घटना समोर आली.
यानंतर पोलिसांनी तपास सुरू केला. या घटनेमुळे राज्याच्या राजकारणात खळबळ उडाली असून सत्ताधारी तृणमूल काँग्रेस आणि विरोधी पक्ष भाजप यांच्यात आरोप-प्रत्यारोप सुरू झाले आहेत.
याच पार्श्वभूमीवर सोशल मीडियावर एक व्हिडिओ मोठ्या प्रमाणात शेअर केला जात आहे. या व्हिडिओमध्ये अनेक पिशव्यांमध्ये मोठ्या प्रमाणात ओळखपत्रे भरलेली दिसतात.
हा व्हिडिओ शेअर करणारे काही युजर्स असा दावा करत आहेत की हे पश्चिम बंगालमध्ये सापडलेले बेकायदेशीर घुसखोरांचे बनावट मतदार ओळखपत्र आहेत.
दावा काय?
पोस्टसोबत असा मजकूर लिहिला आहे की, “असली चोर अब बोल जोर से. चोर चोर चिल्लाने वालों की चोरी देखिए. बंगाल में दाल में काला नहीं बल्कि पूरी दाल ही काली है, एक-एक घुसपैठिए के पास 50-50 वोटर आईडी कार्ड.”
फॅक्ट चेक
तपासाची सुरुवात करताना आम्ही संबंधित कीवर्ड्स वापरून शोध घेतला. त्यामध्ये १० नोव्हेंबर २०२५ रोजी प्रसिद्ध झालेला सियासतचा अहवाल सापडला. या अहवालात व्हायरल व्हिडिओसारखीच एक फोटो दिसून आला.
या अहवालानुसार, माजी अर्थमंत्री आणि सिद्धीपेटचे आमदार टी. हरीश राव यांनी भारत राष्ट्र समिती (BRS)च्या नेत्यांसह १० नोव्हेंबर रोजी तेलंगणाचे मुख्य निवडणूक अधिकारी सुदर्शन रेड्डी यांची भेट घेतली होती. त्यांनी या भेटीत असा आरोप केला की सत्ताधारी काँग्रेस पक्षाने जुबली हिल्स पोटनिवडणुकीसाठी बनावट मतदार ओळखपत्रे तयार केली.
तक्रारीत त्यांनी म्हटले की काँग्रेस पक्ष निवडणुकीचे निकाल प्रभावित करण्यासाठी नियमांचे उल्लंघन करत आहे. तसेच निष्पक्ष निवडणुकीसाठी केंद्रीय सशस्त्र पोलीस दल (CAPF) तैनात करण्याची मागणीही त्यांनी केली.
याच संदर्भात सियासत डेलीच्या एका एक्स पोस्टमध्ये देखील हा व्हिडिओ शेअर करण्यात आला होता. या व्हिडिओमध्ये बीआरएसचे आमदार टी. हरीश राव माध्यमांसमोर बोलताना काँग्रेसवर बनावट मतदार ओळखपत्र तयार केल्याचा आरोप करताना दिसतात.
तसेच, न्यूज18 तेलुगूच्या यूट्यूब चॅनेलवर १० नोव्हेंबर २०२५ रोजी अपलोड केलेला हाच व्हिडिओ आम्हाला सापडला. त्याच्या कॅप्शनमध्ये हरीश राव यांनी बनावट मतदार ओळखपत्र घोटाळ्याचा पर्दाफाश केल्याचे म्हटले आहे.
इंडिया टुडेच्या अहवालातही याच मुद्द्याचा उल्लेख आहे. त्यानुसार, भारत राष्ट्र समितीने आरोप केला होता की तेलंगणामधील जुबली हिल्स पोटनिवडणुकीदरम्यान काँग्रेसने बोगस मतदानासाठी मोठ्या प्रमाणात बनावट मतदार ओळखपत्रे तयार केली.
निष्कर्ष
तपासातून स्पष्ट होते की व्हायरल व्हिडिओसोबत केला जाणारा दावा चुकीचा आहे. या सर्व अहवालांवरून स्पष्ट होते की व्हायरल व्हिडिओचा पश्चिम बंगालशी काहीही संबंध नाही. हा व्हिडिओ पश्चिम बंगालचा नसून तेलंगणातील आहे.
Title: तेलंगणातील जुना व्हिडिओ पश्चिम बंगालमध्ये बनावट मतदार ओळखपत्र म्हणून व्हायरल; वाचा सत्य
Written By: Agastya Deokar
Result: False
