फोनपे कॅशबॅकचा दावा खोटा, बनावट लिंक आणि फसव्या ऑफरपासून सावध रहा

सोशल मीडियावर एक व्हिडिओ व्हायरल होत आहे. त्यामध्ये असा दावा केला जातो की ‘फोनपे’ (PhonePe) आपल्या युजर्सना ४३९० रुपयांपर्यंत फ्री कॅशबॅक देत आहे.

पोस्टमध्ये एक लिंक देण्यात आली आहे आणि त्यावर क्लिक करून कूपन स्क्रॅच करा आणि बक्षीस मिळवा, असे सांगितले जाते. अनेकजण कोणतीही पडताळणी न करता हा पोस्ट शेअर करत आहेत.

फॅक्ट क्रेसेंडोने या दाव्याची तपासणी केली असता हा दावा खोटा असल्याचे स्पष्ट झाले.

दावा काय आहे?

व्हायरल पोस्टमध्ये दाखवलेली इमेज ‘फोनपे’च्या ऑफरसारखी दाखवण्याचा प्रयत्न केला आहे. त्यामध्ये ‘फोनपे’सारखाच जांभळ्या रंगाची थीम आणि लोगो वापरलेला दिसतो. इमेजच्या मध्यभागी “तुम्हाला ‘फोनपे’कडून ४३९० रुपयांचा फ्री कॅशबॅक मिळाला आहे” असे लिहिलेले आहे. खाली “Get Offer” बटणही दाखवले आहे.

व्हिडिओमध्ये असे सांगितले जाते की सर्व ‘फोनपे’ युजर्सना ४३९० रुपयांपर्यंत कॅशबॅक मिळत आहे आणि ते लगेच क्लेम करा.

फॅक्ट चेक

पहिल्या नजरेत पोस्टमधील डिझाइन ‘फोनपे’सारखीच दिसते. पण प्रत्यक्षात ‘फोनपे’च्या अधिकृत ग्राफिक्सची गुणवत्ता, भाषा आणि मांडणी यापेक्षा वेगळी असते. जर ‘फोनपे’ने खरोखर असा मोठा ऑफर दिला असता, तर त्याची माहिती त्यांच्या अधिकृत प्लॅटफॉर्मवर नक्कीच दिली गेली असती. मात्र अशी कोणतीही माहिती आढळली नाही.

आम्ही ‘फोनपे’ची अधिकृत वेबसाइट, फेसबुक, इंस्टाग्राम, ट्विटर, यूट्यूब व लिंक्डइन अकाउंट तपासले. कुठेही अशा ऑफरचा उल्लेख सापडला नाही.

व्हायरल पोस्टमध्ये दिलेली लिंक (https://pardhaanoffers.info) ही ‘फोनपे’शी संबंधित नाही. ही एक बनावट वेबसाइट आहे.

‘फोनपे’ने यापूर्वीही अनेकदा स्पष्ट केले आहे की फसवे लोक नकली कॅशबॅक आणि बक्षिसांच्या नावाखाली लोकांना जाळ्यात ओढतात. ते ‘फोनपे’चे नाव आणि लोगो कॉपी करून असे पोस्ट तयार करतात, जेणेकरून लोकांना ते खरे वाटावे. कंपनीच्या ब्लॉगमध्येही नमूद आहे की काही जण बनावट लिंक आणि सोशल मीडिया पोस्टद्वारे इनाम देण्याचे आमिष दाखवतात.

कंपनीने हेही सांगितले आहे की काही फसवे लोक फोन कॉल करूनही लोकांना बनावट पेमेंट लिंक स्वीकारायला सांगतात, ज्यामुळे त्यांचे पैसे काढले जातात.

हा स्कॅम कसा काम करतो?

जेव्हा तुम्ही अशा वेबसाइटवर जाता, तेव्हा तुम्हाला कूपन स्क्रॅच करण्यास सांगितले जाते. स्क्रॅच केल्यानंतर साइट तुम्हाला ‘फोनपे’ अ‍ॅप उघडायला सांगते. अ‍ॅप उघडताच तुम्हाला थेट पेमेंट पेजवर नेले जाते.

त्या पेजवर लिहिलेले असते की हिरव्या बटणावर क्लिक करा आणि पैसे तुमच्या बँक खात्यात घ्या. पण प्रत्यक्षात तो हिरवा बटण “Pay” म्हणजे पैसे पाठवण्याचा असतो. त्यावर क्लिक केल्यावर अ‍ॅप तुमचा UPI PIN मागते.

अशा प्रकारे वेबसाइट तुम्हाला फसवून तुमच्याकडूनच पैसे पाठवून घेते.

‘फोनपे’मध्ये कॅशबॅक कसा मिळतो?

‘फोनपे’मध्ये कॅशबॅक थेट तुमच्या वॉलेटमध्ये जमा होतो. त्यासाठी कोणत्याही लिंकवर क्लिक करण्याची, फॉर्म भरण्याची किंवा कॉलला उत्तर देण्याची गरज नसते. ‘फोनपे’ कधीही बाहेरील वेबसाइटवर जाऊन कॅशबॅक क्लेम करण्यास सांगत नाही.

कॅशबॅक मिळवण्यासाठी UPI PIN टाकण्याची गरज नसते. PIN फक्त पैसे पाठवताना वापरला जातो, पैसे मिळवताना नाही. जर कोणी तुम्हाला PIN टाकायला सांगत असेल, तर लगेच थांबा आणि याबाबत तक्रार करा.

निष्कर्ष

फ्री कॅशबॅकचा हा व्हायरल दावा पूर्णपणे खोटा आहे. पोस्टमध्ये दिलेली लिंक ‘फोनपे’शी संबंधित नाही. हा एक ऑनलाइन स्कॅम असून लोकांकडून पैसे फसवण्याचा प्रयत्न आहे. अशा कोणत्याही लिंकवर क्लिक करू नका आणि इतरांनाही पाठवू नका. सावध राहणे हाच सर्वोत्तम बचाव आहे.