तेलुगू गाण्याच्या शूटिंगचे फोटो आरक्षणामुळे मृत मुलीचा म्हणून व्हायरल

देशात आरक्षणाच्या मुद्द्याशी जोडत एक फोटो सोशल मीडियावर मोठ्या प्रमाणात व्हायरल होत आहे. या फोटोमध्ये हिरव्या रंगाचे कपडे घातलेली एक मुलगी खुर्चीवर बेशुद्ध अवस्थेत बसलेली दिसते, तर तिच्या आसपास कुटुंबीय रडताना आणि तिला अंघोळ घालताना दिसतात.

हा फोटो शेअर करताना असा दावा केला जात आहे की ही मुलगी सवर्ण जातीची असून, आरक्षणामुळे तिने जीव गमावला.

फेसबुक पोस्ट । आर्काइव पोस्ट 

फॅक्ट चेक

तपासाची सुरुवात करताना आम्ही व्हायरल फोटोचा रिव्हर्स इमेज सर्च केला. त्यामध्ये हा फोटो तेलुगू फिल्म इंडस्ट्रीशी संबंधित असल्याचे आढळले.

आम्हाला हा फोटो तेलुगू चित्रपटसृष्टीत काम करणारे कलाकार मोहन मारीपेल्ली यांच्या फेसबुक पेजवरील एका व्हिडिओमध्ये दिसला. त्या व्हिडिओच्या कॅप्शनमध्ये हे एका गाण्याच्या शूटिंगचे दृश्य असल्याचे नमूद केले आहे. गाण्याचे नाव ‘Idisi Etta Vellave’ असे आहे.

https://www.facebook.com/reel/1649316849264649

मोहन मारीपेल्ली यांच्या प्रोफाइलनुसार ते फिल्म लेखक, अभिनेता आणि दिग्दर्शक आहेत. त्यांच्या फेसबुक पेजवर या गाण्याच्या शूटिंगचे विविध व्हिडिओही शेअर केलेले दिसतात.

पुढील शोधात आम्हाला ‘Warangal Siddu’ या यूट्यूब चॅनेलवर या गाण्याचा प्रोमो आणि पूर्ण गाणेही आढळले. त्यामध्ये व्हायरल फोटोतील दृश्य स्पष्टपणे पाहायला मिळते.

निष्कर्ष

तपासातून स्पष्ट होते की व्हायरल फोटोचा आरक्षणामुळे विद्यार्थिनीच्या मृत्यूशी काहीही संबंध नाही. हा फोटो प्रत्यक्षात ‘Idisi Etta Vellave’ या तेलुगू गाण्याच्या शूटिंगदरम्यानचा आहे. त्यामुळे व्हायरल दावा खोटा आणि दिशाभूल करणारा आहे.