ही बिहारमध्ये राहुल गांधींसाठी जमलेली गर्दी नाही; ही तर गजाजन महारांजी पालखी

बिहारमध्ये विधानसभा निवडणुकीची घोषणा होण्यापूर्वीच विरोधी पक्षनेते राहुल गांधी यांनी कथित मतचोरीचा मुद्दा उपस्थित करत तेथे ‘मतदार हक्क यात्रा’ काढून अप्रत्यक्षरीत्या प्रचाराची सुरुवात केली आहे.

याच पार्श्वभूमीवर एका गर्दीचा व्हिडिओ सोशल मीडियावर शेअर करत दावा केला जात आहे की, “ही बिहारमधील राहुल गांधींच्या ‘मतदार हक्क यात्रे’मधील समर्थकांची गर्दी आहे.”

फॅक्ट क्रेसेंडोच्या वाचकांनी हा व्हिडिओ आमच्या व्हॉटसअॅप फॅक्टलाईन क्रमांकावर (9049053770) पाठवून फॅक्ट-चेक करण्याची विनंती केली.

पडताळणीअंती कळाले की, व्हायरल व्हिडिओमधील गर्दी बुलढाणा जिल्ह्यातील गजानन महाराजांच्या पालखीतील आहे.

काय आहे दावा ?

व्हायरल व्हिडिओमध्ये प्रचंड गर्दी दिसते. युजर्स हा व्हिडिओ शेअर करताना कॅप्शनमध्ये लिहितात की, “बिहार, राहुल गांधी वोटर हक्क यात्रा प्रचंड जनसमर्थन मिळत आहे.”

मूळ पोस्ट – फेसबुक | आर्काइव्ह

तथ्य पडताळणी

रिव्हर्स इमेज सर्च केल्यावर कळाले की, व्हायरल व्हिडिओ बिहारमधील नसून महाराष्ट्रातील आहे.

एका युट्यूब चॅनलने हाच व्हिडिओ 1 ऑगस्ट रोजी अपलोड केला होता. व्हिडिओच्या कॅप्शनमध्ये लिहिले होते की, “खामगाव ते शेवगाव गजानन महाराजांसोबत भक्तांची तुफान गर्दी.”

महत्वाची बाब म्हणजे बिहारमधील ‘मतदार हक्क यात्रा’ 17 ऑगस्ट रोजी सासाराम येथून सुरू झाली होती आणि व्हायरल व्हिडिओ त्याआधीच म्हणजे 1 ऑगस्टपासून माध्यमांवर उपलब्ध आहे.

‘साम टीव्ही’नेदेखील अधिकृत फेसबुक पेजवर हाच व्हिडिओ शेअर केल्याचे आढळले. सोबत दिलेल्या महितीनुसार, आषाढी वारीच्या निमित्ताने पंढरपूरला गेलेली संत गजानन महाराजांची पालखी 64 दिवसात 1400 किलोमीटरचा पायी प्रवास पूर्ण करत शेगावला पोहोचली.

https://www.facebook.com/share/r/1DGHuFZcgb

संत गजानन महाराजांची ही 56 वी वार्षिक पालखी असून ही पदयात्रा 1 जून रोजी पंढरपूरला रवाना झाली आणि 31 जुलै रोजी बुलढाणा जिल्ह्यातील शेगावला परतली. या प्रवासात 700 पेक्षाजास्त वारकरी, भजन पथके आणि घोडे सहभागी झाले होते. अधिक महिती येथे व येथे वाचू शकता.

मूळ पोस्ट – दिव्यमराठी

मतदार हक्क यात्रा

राहुल गांधी यांनी 17 ऑगस्ट रोजी बिहारमधील रोहतास जिल्ह्यात ऐतिहासिक शहर सासाराम येथून ‘मतदार हक्क यात्रे’ला सुरुवात केली. राहुल गांधी 16 दिवसांच्या या यात्रेत 23 जिल्हे आणि 50 विधानसभा मतदारसंघांत कथित मतचोरीचा मुद्दा उपस्थित करणार आहेत. अधिक महिती येथे, येथे व येथे वाचू शकता.

या यात्राते थेट प्रसारण राहुल गांधी आणि काँग्रेसच्या अधिकृत युट्यूब चॅनलवर उपलब्ध आहेत.

निष्कर्ष

व्हायरल व्हिडिओमधील गर्दी राहुल गांधींच्या बिहारमधील ‘मतदार हक्क यात्रे’ची नाही. मुळात ही गर्दी बुलढाणा जिल्ह्यातील गजानन महाराजांच्या पालखीसाठी जमलेल्या भक्तांची होती. भ्रामक दाव्यासह हा व्हिडिओ व्हायरल होत आहे.

(तुमच्याकडेदेखील काही संशयास्पद मेसेज, पोस्ट, फोटो, व्हिडिओ किंवा बातम्या असतील तर फॅक्ट चेक करून घेण्यासाठी त्या आमच्या व्हॉटसअॅप फॅक्टलाईन क्रमांकवर (9049053770)  पाठवा. लेटेस्ट फॅक्ट चेक वाचण्यासाठी फॅक्ट क्रेसेंडोला फेसबुक, इन्स्टाग्राम व ट्विटर येथे फॉलो करा.)