संजय निरुपम यांनी स्वपक्षीय एकनाथ शिंदे यांना गद्दार म्हटले का ? वाचा सत्य

कॉमेडियन कुणाल कामराच्या वादग्रस्त व्हिडिओनंतर आता शिंदे सेनेचे नेते संजय निरुपम यांची एक व्हिडिओ क्लिप सोशल मीडियावर व्हायरल होत आहे. 

दावा केला जात आहे की, शिंदे सेनेचे नेते संजय निरुपम यांनी एकनाथ शिंदे यांना गद्दार म्हटले.

फॅक्ट क्रेसेंडोच्या वाचकांनी हा व्हिडिओ आमच्या व्हॉटसअॅप फॅक्टलाईन क्रमांकवर (9049053770) पाठवून फॅक्ट चेक करण्याची विनंती केली.

पडताळणीअंती कळाले की, व्हायरल व्हिडिओ एडिटेड आहे.

काय आहे दावा ? 

व्हायरल व्हिडिओमध्ये एएनआयचा माईक आणि लोगो दिसतो. सोबत संजय निरुपम एकनाथ शिंदे यांना गद्दार म्हणताना दिसतात.

युजर्स हा व्हिडिओ शेअर करताना कॅप्शन लिहिले होते की, “ज्यांच्याबद्दल मनात शिंदे साठी अशी भावना आहे. आज तेच गद्दार एकनाथ शिंदे, संजय निरुपम यांच्या प्रचार सभे साठी येत आहेत.”

पोस्ट – फेसबुक | आर्काइव्ह

तथ्य पडताळणी

रिव्हर्स इमेज सर्च केल्यावर कळाले की, व्हायरल व्हिडिओ 10 महिन्यांपूर्वीचा असून अर्धवट आहे.

एएनआयने 10 मे 2024 रोजी आपल्या अधिकृत युट्यूब चॅनलवर संपूर्ण व्हिडिओ शेअर होता. 

व्हिडिओच्या कॅप्शनमध्ये लिहिले होते की, “संजय निरुपम यांची काँग्रेस, उद्धव ठाकरे यांच्यावर घणाघाती टीका.”

हा व्हिडिओ पाहिल्यावर कळते की, संजय निरुपम हे एकनाथ शिंदेंवर नाही तर उद्धव ठाकरे गटावर टीका करत होते.

व्हिडिओच्या सुरुवातीलाच संजय निरुपम म्हणतात की, शिवसेना उबाठा गटाच्या महिला खासदारांनी म्हटले आहे की, महाराष्ट्राचे मुख्यमंत्री एकनाथ शिंदे यांच्या मुलाच्या कपाळावर लिहिले पाहिजे की, “माझे वडिल गद्दार आहेत.”

पुढे ते म्हणतात की, यावर मी त्यांना उत्तर देऊ इच्छितो की, “शिवसेने (उबाठा) आणि  उद्धव ठाकरे यांनी गद्दारी केली आहे. त्यांनी भारतीय जनता पार्टी (भाजप), मतदार आणि बाळासाहेब ठाकरेंशी गद्दारी केली आहे.”

एएनआयच्या अधिकृत ट्विटर अकाउंटवर हेच वक्तव्य पाहू शकतो.

तसेच खालील तुलनात्मक व्हिडिओ पाहिल्यावर आपल्या लक्षात येईल की, मूळ व्हिडिओला एडिट करून अर्धवट वाक्य पसरविले जात आहे.

मग हे वक्तव्य कोणी केले ?

शिवसेनेच्या (ठाकरे गट) राज्यसभा सदस्या प्रियंका चतुर्वेदी यांनी 9 मे 2024 रोजी एका निवडणूक प्रचार सभेला संबोधित करताना “दिवारमध्ये ( हिंदी चित्रपट ) अभिनेता अमिताभ बच्चन यांच्या हातावर “माझे वडिल चोर आहेत,” असे लिहिले होते. त्याच प्रमाणे श्रीकांत शिंदेंच्या कपाळावर लिहले आहे की, “माझे वडिल गद्दार आहेत,” असे म्हटले होते. संपूर्ण बातमी येथे वाचू शकता.

निष्कर्ष

यावरुन सिद्ध होते की, व्हायरल व्हिडिओ अर्धवट आहे. मुळात संजय निरुपम हे एकनाथ शिंदे यांना गद्दार म्हणत नाही तर शिवसेनेच्या (ठाकरे गट) नेत्या प्रियंका चतुर्वेदी यांच्या वक्तव्याचे विरोध करत होते. खोट्या दाव्यासह अर्धवट वक्तव्याचा व्हिडिओ पसरविले जात आहे.

(तुमच्याकडेदेखील काही संशयास्पद मेसेज, पोस्ट, फोटो, व्हिडिओ किंवा बातम्या असतील तर फॅक्ट चेक करून घेण्यासाठी त्या आमच्या व्हॉटसअॅप फॅक्टलाईन क्रमांकवर (9049053770)  पाठवा. लेटेस्ट फॅक्ट चेक वाचण्यासाठी फॅक्ट क्रेसेंडोला फेसबुक, इन्स्टाग्राम व ट्विटर येथे फॉलो करा.)