चंद्रपूर जिल्ह्यातील ब्रहमपुरी गेस्ट हाऊस परिसरात वाघाने एका व्यक्तीवर हल्ला केल्याचे थरारक दृश्य सीसीटीव्हीत कैद झाले आहे. असा दावा करणारा एक व्हिडिओ सोशल मीडियावर व्हायरल होत आहे.
फॅक्ट क्रेसेंडोच्या वाचकांनी हा व्हिडिओ आमच्या व्हॉटसअॅप फॅक्टलाईन क्रमांकवर (9049053770) पाठवून फॅक्ट-चेक करण्याची विनंती केली.
पडताळणीअंती कळाले की, व्हायरल व्हिडिओ एआय तंत्राद्वारे तयार करण्यात आला आहे.
काय आहे दावा ?
व्हायरल व्हिडिओमध्ये एका व्यक्तीवर वाघ हल्ला करुन शिकार प्रमाणे घेऊन जाताना दिसतो.
युजर्स हा व्हिडिओ शेअर करताना कॅप्शनमध्ये लिहितात की, “चंद्रपूर जिल्ह्यातील ब्रहमपुरी गेस्ट हाऊस परिसरात वाघाचा हल्ला; थरारक दृश्य सीसीटीव्हीत कैद.”
मूळ पोस्ट – फेसबुक | आर्काइव्ह
तथ्य पडताळणी
सर्वप्रथम वाघाने हल्ला केल्याची अशी कोणती घटना घडली खरंच घटली असती तर ही मोठी बातमी ठरली असती. परंतु, कोणत्यही अधिकृत माध्यमांवर अशी कोणतीही घटना घडल्याची बातमी आढळत नाही.
पुढे, रिव्हर्स इमेज सर्च केल्यावर कळाले की, व्हायरल व्हिडिओ खरा नाही.
व्हायरल व्हिडिओची दखल घेत पीआयबी महाराष्ट्र 7 नोव्हेंबर रोजी हाच व्हिडिओ ट्विट करत स्पष्ट केले की, “व्हायरल होत असलेला व्हिडिओ AI तंत्राद्वारे तयार करण्यात आलला आहे. चंद्रपूर जिल्ह्यातील ब्रहमपुरी गेस्ट हाऊस परिसरात वाघाने कोणावर हल्ला केला नाही. अशा प्रकारचे दिशाभूल करणारे एआय-जनरेटेड व्हिडिओ लोकांमध्ये अनावश्यक भीती निर्माण करू शकतात. नागरिकांना सल्ला देण्यात येत आहे की, त्यांनी असे कोणतेही कंटेंट शेअर किंवा फॉरवर्ड करू नये.”
तसेच चंद्रपूर जिल्हा माहिती कार्यालयाने ट्विट करत व्हायरल व्हिडिओचे खंडन करत लिहिले की, “ब्रम्हपुरी वनविभागातील वनविश्रामगृह येथे एका इसमावर वाघाच्या हल्ल्याचा व्हिडीओ बनावट असून सदर व्हिडीओ कृत्रिम बुद्धिमत्तेच्या (Artificial Intelligence – AI) साहाय्याने तयार केला आहे.”
चंद्रपूर जिल्हा माहिती कार्यालय आपल्या अधिकृत ब्लॉगवर सविस्तर स्पष्टीकरण देताना सांगितले की, “वनविभागाच्या माहितीनुसार, संबंधित व्हिडीओ पूर्णपणे कृत्रिम बुद्धिमत्तेच्या साहाय्याने तयार केलेला आहे.अलीकडील काळात ब्रम्हपुरी परिसरात मानव-वन्यजीव संघर्षाच्या काही घटना घडल्या असल्या तरी, या बनावट व्हिडीओचा त्याच्याशी काहीही संबंध नाही. तसेच मुख्य वनसंरक्षक (प्रा.) आर. एम. रामानुजम यांनी सांगितले की, “या व्हिडीओची निर्मिती व प्रसारण करणाऱ्यांविरुद्ध विभागाने गंभीर दखल घेतली असून कठोर कायदेशीर कारवाई करण्यात येणार आहे. अशा प्रकारच्या खोट्या व दिशाभूल करणाऱ्या व्हिडीओंवर विश्वास ठेवू नये.”
निष्कर्ष
यावरुन सिद्ध होते की, चंद्रपूरतील ब्रहमपुरी गेस्ट हाऊस परिसरात वाघाने कोणवर हल्ला केला नाही, व्हायरल सीसीटीव्हीमधील द्दश्य एआय तंत्राद्वारे तयार करण्यात आले आहे. खोट्या दाव्यासह हा व्हिडिओ सोशल मीडियावर व्हायरल होत आहे.
(तुमच्याकडेदेखील काही संशयास्पद मेसेज, पोस्ट, फोटो, व्हिडिओ किंवा बातम्या असतील तर फॅक्ट-चेक करून घेण्यासाठी त्या आमच्या व्हॉटसअॅप फॅक्टलाईन क्रमांकवर (9049053770) पाठवा. लेटेस्ट फॅक्ट-चेक वाचण्यासाठी फॅक्ट क्रेसेंडोला फेसबुक, इन्स्टाग्राम व ट्विटर येथे फॉलो करा.)
Title:चंद्रपूरतील गेस्ट हाऊस परिसरात वाघाने हल्ला केला नाही; खोट्या दाव्यासह AI व्हिडिओ व्हायरल
Fact Check By: Sagar RawateResult: False
