बिबट्याचा तो व्हिडिओ पुण्यातील नाही, कर्नाटकचा व्हिडिओ इकडे व्हायरल; वाचा सत्य

पुण्याच्या भोसरी भागातील संत तुकाराम नगरमध्ये एका रस्त्यावर बिबट्या दिसला, या दाव्यासह एक व्हिडिओ क्लिप सोशल मीडियावर व्हायरल होत आहे.

फॅक्ट क्रेसेंडोच्या वाचकांनी ही क्लिप आमच्या व्हॉटसअॅप फॅक्टलाईन क्रमांकवर (9049053770) पाठवून फॅक्ट चेक करण्याची विनंती केली. 

पडताळणीअंती कळाले की, व्हायरल ही क्लिप पुण्याची नसून ती कर्नाटकमधील आहे. चुकीच्या दाव्यासह क्लिप व्हायरल होत आहे.

काय आहे दावा ?

51 सेकंदाच्या या क्लिपमध्ये एका रस्त्यावर बिबट्या बसलेला दिसतो. बिबट्याला पाहून अनेक वाहने माघारी फिरतात.

हा व्हिडिओ शेअर करताना युजर्स लिहितात की, “पुण्यातील भोसरीत नागरिकांना रात्री अचानक बिबट्या दिसल्याने चांगलीच तारांबळ उडाली. परंतु बिबट्या एका ठिकाणी बसून राहिल्याने कोणतीही जीवितहानी झाली नाही.”

मूळ पोस्ट – फेसबुक | आर्काइव्ह

तथ्य पडताळणी 

रिव्हर्स इमेज केल्यावर कळाले की, व्हायरल व्हिडिओ पुण्यातील नाही.

टाईम्स नाऊने दिलेल्या बातमीनुसार हा व्हिडिओ कर्नाटकमधील गडग जिल्ह्यातील बिनकडकट्टी गावातील आहे.

16 एप्रिल 2023 रोजी रात्री तेथील राष्ट्रीय महामार्ग क्र. 67 वर बिबट्या ठाण मांडून बसला होता. त्यामुळे काही काळ वाहतुकीला अडथळा निर्माण झाला होता. ही क्लिप समोर आल्यानंतर स्थानिक प्राणीसंग्रहालयातून हा बिबट्या पळून आल्याची अफवा पसरली होती. 

बिनकडकट्टी येथील उप वनसंरक्षक दीपिका बाजपेयी यांनी या अफवेचे खंडन करताना सांगितले की, “गडग प्राणीसंग्रहालयातून कोणताही बिबट्या पळून गेलेला नाही. ही निव्वळ अफवा आहे. बिनकडकट्टी रोडवर दिसलेला बिबट्या आसपासच्या वनक्षेत्रातून आलेला असावा.”

फॅक्ट क्रेसेंडोने दीपिका बाजपेयी यांच्याशी संपर्क साधला असता त्यांनी सांगितले की, व्हायरल व्हिडिओमधील बिबट्या कर्नाटकच्या गडग जिल्ह्यातील एका गावात आढळला. आम्ही प्राणीसंग्रहालय आणि पशुवैद्यकीय कर्मचाऱ्यांसोबत कोम्बिंग ऑपरेशन राबवले होते. बिबट्याला जंगलात परत जाण्याचा मार्ग सापडेलेला आहे. तरीदेखील आम्ही त्याच्यावर लक्ष ठेऊन आहोत.

सदरील माहितीच्या आधारे गुगल मॅप्सवर शोध घेतल्यावर व्हिडिओ क्लिपमधील जागा सापडली. ती आपण इथे पाहू शकतात.

खाली दिलेली तुलना पाहिल्यावर आपल्याला लक्षात येईल की, व्हायरल व्हिडिओ आणि मॅपमधील दोन्ही रस्ते एकच आहेत.

निष्कर्ष

यावरून सिद्ध होते की,व्हायरल व्हिडिओ क्लिप पुण्याची नसून ती कर्नाटकची आहे. चुकीच्या दाव्यासह क्लिप व्हायरल होत आहे.

(तुमच्याकडेदेखील सोशल मीडियाच्या माध्यमातून संशयास्पद मेसेज, पोस्ट, फोटो, व्हिडिओ किंवा बातम्या असतील तर त्यांची सत्यता जाणून घेण्यासाठी त्या आमच्या व्हॉटसअॅप फॅक्टलाईन क्रमांकवर (9049053770)  पाठवा. आमचे लेटेस्ट फॅक्ट-चेक वाचण्यासाठी फॅक्ट क्रेसेंडोला फेसबुक, इन्स्टाग्राम व ट्विटर वर फॉलो करा.)