पहलगाम हल्ल्यातील दहशतवाद्याच्या पहिला फोटो म्हणून माध्यमांनी शेअर केला जुना फोटो; वाचा सत्य

कश्मीरमधील पहलगामवरील हल्ल्याच्या पार्श्वभूमीवर एक फोटो सोशल मीडियावर व्हायरल होत आहे. त्यामध्ये पठाणी सूट घातलेला एक व्यक्ती हातात अत्याधूनिक शस्त्र घेऊन पाठ करुन उभा आहे.

दावा केला जात आहे की, हा पहलगाम हल्ल्यातील दहशतवाद्याचा फोटो आहे.

फॅक्ट क्रेसेंडोच्या वाचकांनी हा फोटो आमच्या व्हॉटसअॅप फॅक्टलाईन क्रमांकावर (9049053770) पाठवून फॅक्ट-चेक करण्याची विनंती केली.

पडताळणीअंती कळाले की, व्हायरल फोटो 2021 पासून सोशल मीडियावर उपलब्ध आहे.

काय आहे दावा ?

व्हायरल फोटोमध्ये एक व्यक्ती हातात अत्याधूनिक शस्त्र घेऊन पाठ करुन उभा असल्याचे दिसते.

एबीपी माझा, लोकमत, जय महाराष्ट्र आणि थोडक्यात या वृतसंस्थांनी आपल्या बातमी पत्रात व्हायरल फोटो शेअर करत दावा केला आहे की, “हा पहलगाम हल्ल्यातील दहशतवाद्याचा पहिला फोटो आहे.” 

तसेच एबीपी माझा, जय महाराष्ट्र न्यूज (आर्काइव्ह), लाईव्ह मराठी, लोकमत, सुदर्शन मराठी, एशियन मराठी न्यूज या सारख्या न्यूज संस्थांनी आपल्या अधिकृत फेसबुक पेजवर व्हायरल फोटो शेअर करत कॅप्शनमध्ये लिहिले की, “पहगाम हल्ल्यातील दहशतवाद्याचा पहिला फोटो समोर आला.”

मूळ पोस्ट – फेसबुक | आर्काइव्ह | फेसबुक | आर्काइव्ह

मूळ पोस्ट – फेसबुक | आर्काइव्ह | फेसबुक | आर्काइव्ह

मूळ पोस्ट – फेसबुक | आर्काइव्ह | फेसबुक | आर्काइव्ह

तथ्य पडताळणी

रिव्हर्स इमेज सर्च केल्यावर कळाले की, व्हायरल होत असलेला फोटो 4 वर्षांपासून सोशल मीडियावर उपलब्ध आहे.

बिलालखान नामक युजरने 26 ऑक्टोबर 2021 रोजी एका व्यक्तीचा गोळीबार करतानाचा व्हिडिओ फेसबुकवर अपलोड केला होता. 

कॅप्शनमध्ये “जिहादी गाण्यांसाठी आमचे पेज लाईक करा” असे उर्दू भाषेत लिहिले दिसते.

या व्हिडिओमध्ये गोळ्या झाडणारा व्यक्ती 27 सेकंदावर वळताना दिसतो.

खालील स्क्रीनशॉट पाहिल्यावर लक्षात येईल की, व्हायरल फोटो याच व्हिडिओमधून घेतलेला आहे.

दहशतवाद्यांचे रेखाचित्र

द हिंदूने 23 एप्रिल रोजी इंस्टाग्रामवर सुरक्षा संस्थांनी जारी केलेल्या 3 दहशतवाद्यांचे रेखाचित्र शेअर केले. 

कॅप्शनमध्ये सांगिते होते की, “दक्षिण काश्मीरमधील पहलगामजवळ 26 पर्यटकांचा मृत्यू झालेल्या दहशतवादी हल्ल्यात सहभागी असलेल्या तीन संशयितांचे रेखाचित्र सुरक्षा संस्थांनी आज जारी केले. हल्ल्यात वाचलेल्यांच्या मदतीने हे रेखाचित्रे तयार करण्यात आले आहे.” 

निष्कर्ष

यावरुन सिद्ध होते की, व्हायरल फोटो 4 वर्षांपूर्वीचा आहे. 2021 पासून सोशल मीडियावर उपलब्ध असलेल्या व्हिडिओचा स्क्रीनशॉट पहलगाम हल्ल्याशी जोडून शेअर केला जात आहे.

(तुमच्याकडेदेखील काही संशयास्पद मेसेज, पोस्ट, फोटो, व्हिडिओ किंवा बातम्या असतील तर फॅक्ट चेक करून घेण्यासाठी त्या आमच्या व्हॉटसअॅप फॅक्टलाईन क्रमांकवर (9049053770)  पाठवा. लेटेस्ट फॅक्ट चेक वाचण्यासाठी फॅक्ट क्रेसेंडोला फेसबुक, इन्स्टाग्राम व ट्विटर येथे फॉलो करा.)